بفتكرك أوي ..وأحنا صغيرين..بفتكرك وانت فتي الشارع الأول..وبتعمل زي سوبر مان وبتضرب كل العيال..وبتلعب معايا وبتعاملني أحسن من كل العيال ...وكل العيال الغيرانين بيقعدوا يتكلموا علينا ويقولوا أشمعنه..فاكر لما كنت ماسك اللعبه..وزعقت مع الوله صاحبنا عشان زعق فيا..وطلعته بره اللعب عشان خاطري...ياااااااااااااااااااااااااه..حاجات جميله أوي
مش قادره أنسي مشهد لينا أبدا واحنا صغيرين وانا قاعده علي سطح الجيران بعيط عشان ماما ضربتني وطبعا مش فاكره ليه؟؟ بلاوينا سوا كانت كتيره تزويغ وبنضرب العيال وتشرد!!!
فاكر بقي لما قعدت جمبي علي سطح الجيران ع الارض وانا بعيط وراسي محطوطه علي رجلي وطبطبت عليا وقولتلي ما تزعليش وبكره نكبر ونتجوز ومامتك ما تضربكيش تاني وعيطت عشان انا بعيط...ياااااااااااه ..هو أنت جميل أوي كدا ليه..وانا بحبك أوي كدا ليه
فاكره ايدك الصغيره ..اللي ما كنتش بتسيب ايدي..وفاكره الفلوس الفكه اللي كنت بتلمها وانا بلمها ونخرج سوا فاكرين اننا هنشترب العالم ..فاكر أول يوم تحس فيه انك كبرت شويه بدأت تبطل لعب ف الشارع وقولتلي انا بلعب شطرنج..وطبعا مش بتعرف تلعب ولا حاجه وقاعد تحرك وانا أحرك قدامك اللعب وأهي حجه عشان نفضل عاملين عيال ونلعب مع بعض
فاكره جرس عجلتك لغاية دلوقتي ..فاكره السارينا اللي كنت بجهز نفسي ع الباب أول ما أسمعها من بعيد ..وفاكره البسكوت اللي كنت بتجيبهولي ف المدرسه من مصروفك وتعمل راجل وما ترضاش تاخد مني فلوسه...وفاكراك انت اكتر وانت بتبدأ تكبر كدا وجاي بردوا علي سطح الجيران وقاعد جمبي وعينك بتضحك ضحكه شبه اللي أكتشف حاجه أو اللي خد جايزه وبتقوللي وبكل فخر تعرفي أنا عملت ايه النهارده..أنا شربت سيجاره
أنا مش هنسي أبدا أن أول حد قولتله علي أول سيجاره شربتها وأول احساس بالمراهقه تبدأ تحسه هو أنا...وأنا طول الوقت حاسه انك بتتصرف ف الحياه عشاني ..فاكر يا حبيبي فاكر؟؟
فاكر سطح الجيران دا فعلا؟؟ ...يستاهل يتغناله بجد
فاكر عياطنا وفرحنا وخططنا كلها عليه...وحتي الطيارات الورق اللي كنا بنعمل فيها بالساعات ونرجع نطيرها كنا بنعملها ونطيرها عليه
أوعاك بقي ما تكونش فاكر؟؟
وأوعاك ما تكونش أنت؟؟
أنا مصدقه بجد أنه انت....شامه فيك ريحته شماها..شامه ريحة الوقت دا...ريحة العيل دا...وريحة الزمن دا...شبه راحتي وشبه فرحتي ف الوقت دا
أنا فعلا شايفاك سوبر مان...حبيبي اللي بيعمل أي حاجه وعنده أستعداد يعمل أي حاجه عشاني...وبيحللي كل مشاكلي ..هو أنت مش كنت بتعمل كدا ؟؟
ولا أفكرك
مش كنت بتشيل حاجات تقيله جدااااااااا....وتشيل شنطتي وشنطتك...وتتعور وتقوللي مش بتوجعني...وتشلني واحنا بنلعب...وأفضل قلقانه ومش حاسه بقيمتي ف اللعب لغاية ما تيجي
بتهيألي مش هفرح لما أبقي عروسه زي ما كنت بفرح لما بنلعب عروسه وعريس سوا
أنا بحبك أوي أوي أوي
ومصدقه ان أنت أوي أوي أوي
أوعاك تقول مش انت؟؟لا أنت...أه أه انت
وأول مره شوفتك حسيت اني لقيتك بقي ...بقالنا كتير ما لعبناش سوا يا فتي ألعابي
لعبني بقي لعبني
حبيبتك وبحبك
